المشهد الاول
ركبت الاوتوبيس وكانت المفاجأة انه فاضي الاوتوبيس مهكع لكن متلون باللون الاخضر الجديد اديت الكمسري حته بربع لقيته بيقول لا التذكرة بخمسين قرش قال ايه الاوتوبيس اتلون بالاخضر وبقى شبه الاتوبيس اللي قالوا عليه انه خدمة مميزة قولتله
تصدق بالله الحكومة بتاعتنا دي صايعة لونت الاوتوبيس وعلت التذكرة
وبعدها افتكرت احمد نظيف اطال الله قامته كمان وكمان لما كان بيتكلم عن الاوتوبيسات الجديدة وقال انه هيوفر عربيات من كل الانواع بمختلف الاسعار علشان مختلف طوائف الشعب وبعدها بشوية ينسى الكلام ويغلي كله والحجة عنده ايه ان الاوتوبيس اتلون ماشي يا عم نظيف نظف الله جيوبك مثلما نظفت جيوبنا
المشهد الثاني
فجأة امي شعرت بتعب وغلطنا وجبنا الدكتور البيت
قاس الضغط
ضحك
علق محلول الملح اللي في الصيدلية باربعة جنيه
وخلاص
الحساب كام يا عمنا
250 جنيه
قلت بصدمة
ليه
قال 100 كشف و150 للمحلول
يا عمنا المحلول باربعة جنية
قال انما في البيت 250
حسيت انه زهق ودفعت الفلوس لاخر قطرة في جيبي وسألت نفسي
يعني لو ماكنش معايا كنت اعمل ايه
طب الناس اللي ممعاهاش يعملوا ايه يموتوا وكمان كان في سؤال برئ
هو في حد من الكبار حاسس بينا
المشهد الثالث
واحدة كانت بتعيط وابوها بيواسيها ايه الحكاية؟
باختصار انها معرفتش تحجز قصر بعشرة مليون جنيه علشان الحجز خلص وما فيش غير القصر اللي بخمسة مليون
بس خلاص
